Tomohon, GlobalBerita.com – Biar Tomohon tetap aman, Tim Unit Reaksi Cepat (URC) Polres Tomohon nyanda tinggal diam. Jumat (28/08) malam, tim ba patroli KRYD di wilayah hukum Polres Tomohon.
Giat ini langsung pimpin Kanit URC Polres Tomohon, Aipda Bima Pusung. Sasaran dorang tu anak-anak muda yang masih nongkrong di pinggir jalan sampe larut malam.
Di lapangan, anggota URC periksa badan satu per satu. Dorang suruh angka baju, cek di pinggang, mo pastikan nyanda ada yang ba bawa sajam.
Aipda Bima Pusung bilang, ini for cegah sebelum terjadi.
“Torang nyanda mo tunggu ada kejadian baru ba tindak. Satu sajam kalo lolos, boleh jadi tawuran, baku tikang, sampe hilang nyawa. Makanya torang sisir, torang pariksa, abis itu torang bina,” tegas Aipda Bima Pusung.
Hasil pemeriksaan di beberapa tampa di pusat Kota Tomohon, puji Tuhan nyanda ada dapa sajam ato barang-barang terlarang. Tu anak-anak muda cuma dapa data deng dapa nasehat supaya jang nongkrong sampe larut, lebe bae balik jo ka rumah.
Di bagian akhir, Aipda Bima Pusung kase statement pamungkas.
“Torang URC Polres Tomohon akan terus ada di tengah-tengah masyarakat. Torang mo himbau for ade-ade samua, jang ba bawa sajam, jang iko tawuran. Kasiang orang tua di rumah yang ba tunggu. Kalo lia hal-hal yang mencurigakan, langsung jo lapor pa torang. Tomohon musti aman!” tutup Aipda Bima Pusung.
